خل نرميه!!!

ما اقول اني من عيال نيدو ولا اصنف روحي ماك جيكن

لا عشت اب مجتمع مؤمرك (نسبة الى امريكا)

ولا دردعت من خليط الفكر و الحركات الغربية

بس الحق ينقال !! انا هالكور ما عاد ايوزله خنبقت هالمجتمع العوي

مادري الناس شصابهم ؟! مرض ولا سلال !!

لما اوادم تسقيهم دم عروقك و ينشفون كل قطره بحنيورك من لبحتهم و دعالتهم

و اتوايهم بنفس طيبة ماتبي الا ويه الله

بيوم وليله ينقلبون عتاوية وذيابة ...

ذيج الأظافر لمحنيّة تنقلب مخالب تنهش يسد من رافجها !

قِلَّت الوفا صارت هبَّه ! شِكِل لهدوم و لسوارات ولبقم (جمع بقمة)!

لا قعدت افكر شللي يخلي الناس تفصخ ثوب الحيا ولخلاص ؟!

وتبيع من خاواها برخيص ؟!

الاقي روحي بمتاهه لها اول مالها تالي ..!

نوبه اقول مثل ماقال لوليين ... لنفوس ما عادت متصافية مثل لول ؟!

ونوبة اقول انا بزمن ما ينفع فيه الطيب و السنع صار عرّة

و ساعات احاسب نفسي على شي بزمان يدودنا كان فضيله

و بزمنا صار اهبال و طيبة مامنها فود

شللي يخلي الادمي اللي افضالك ماله فيها قيش ...

يتنكرلك بلحظة ضعف اتريا فيها من يسدد ويردد عنك تناتيف اغلاط؟

تحسبه فشلان من كثر جمايلك عليه و على طوايفه

وهو شايل بقلبه حقد وحسد لو تقسمه على خلق الله حتى البهايم والشير يصير لهم دثار !!!!

لكن .. ليش عوار القلب و لمفوجر اللي يبط الراس ؟

درب السلامة للي ترك الوفا

و لا على قولة النفيسي "خل نرميه" ... !

وجود هالاوادم من عدمه واحد !

لا و يمكن موتهم في دفتر الذكريات ابرك!

برميهم برصاص الصمت والنسيان وامسحهم من دفتر اللي ياي

كانوا ... بالأول ... كانوا ..

كانت لهم ارواح و نسم و فرية

كاااااااااااااااااااان لهم في دفتري عنوان !

بس الحين حالهم من حال ايٍ كااااان

لا وبعد ...

خل نرميهم